Asof ons nie lank genoeg gesukkel het om die tune uit die kop te skud nie…
Vanilla Ice het met ‘n hip hop beat box boog uit die 90’s direk tot in 2009 gespring. Die Ice Ice Baby tune is terug en het behoorlik weer in my kop kom vashaak! Hy vier op 31 Okt sy 42ste verjaarsdag en het darem die Johnny Bravo hairdo gelos…as jy nog nie genoeg gehoor het nie, luister gerus weer…
9 Oktober is Wêreld Eierdag . Dit word amptelik op die tweede Vrydag van Oktober gevier deur feeste en kompetisies te hou. Verskeie kooksessies word bygewerk en natuurlik is daar speeltyd en dinge vir die kinders.
Die gedagte is om die voedingswaarde en nut van eiers te verkondig…en terwyl jy nou in die pad val om ‘n paar eiers te koop – koop sommer ‘n paar om aan iemand te skenk…hierdie sin klink nou ‘n bietjie “af”…
But speaking of which…frustreer dit jou nie as mense foto’s van hul baarmoedersonars sommer so op webwerwe soos Facebook plaas nie?! Dis algemeen aanvaarbaar dat dit verkeerd is om kaal foto’s van Lady Godiva te plaas, maar dan gaan jy in die diepste binneste kanale van Lady Godiva se binnekamer en wys vir die wêreld wat dáár aangaan? En om alles te kroon word die piepiestrokies – gepiepie – ook afgeneem?! Wie wil nou na jou piepie en baarmoeder staar?!
Izak de Villiers: gebore 30 Julie 1936 (Paarl), is vandag 27 September 2009 oorlede.
Ek wou nog geluk gesê het met die nuutste boek…
Vir meer as ‘n jaar – dalk reeds twee – is daar ‘n ontwikkelingsprogjek reg oorkant my huis. Reuse vaalbruin stofwolke hang gedurig oor die eens spierwit geboue – weens groot dump trucks wat modder en rivierklippe heen en weer karwei. Karwei is ook nie die regte woord nie, want soggens voor 7vm hoor jy hoe die dump trucks nader snel en dan al kletterend en spoegend op die afdraaipad afstorm. Vir die volgende uur of twee luister jy na die oorverdowende gekletter van bakwerke en die gesis van remme terwyl vier tot ses vragmotors aan-aan pad af speel. Praat jy met die hoofman (lees jong botterbulletjie wat homself met ‘n spiertier verwar) trek hy sy nekkie op ‘n arrogante knop en vertel hy vir jou hulle gaan nie lank besig wees nie. Nou ja, nie lank nie trek nou al by sy peuterjare!
Ek verpes ontwikkelaars en wens die een hier oorkant my ‘n reuse, pynlike aambei toe.
Vandag se koerante plaas ‘n interessante blik op die adamsgewaad…’n Getroude Dominee het ‘n katelknaap op die internet ontmoet en vir lui-lekker vrysessies op ‘n plaas ontmoet. Dit was ook nie enige een se plaas nie, maar dié van Katelknaap se kêrel. Kêrel het onraad vermoed toe hy vreemde spore gewaar het en vir sy werkers daaroor uitgevra het. Dié het toe vertel van die spore en na ‘n kort ondersoek het Kêrel sy katelknaap en die prediker betrap – sommer daar in die bosse.
Soos Coligny se eie kerkblaaie verkondig…WOELINGE…KRY NUWE KLIMAKS.
Ek wil ‘n tattoo hê…’n netjiese een, ‘n lynskets in dun, kunstige swart lyne. Ek krap al lank op die net rond vir prentjies van een…skoenlappers, my zodiac / sterreteken, my gunstelinghond – ‘n mopshond…Hoe kies jy een wat nie gaan verrimpel met die ouderdomsvette nie? Hoe weet jy dat jou simbool van vryheid nie die een of ander vloek uitspreek in die een of ander taal of een of ander sekte nie? Ghmm…sal maar net moet probeer…
Wat sal jy laat “ink” as jy moes kies? Wat van ‘n Angelina Jolie skilderdoek?
Die afgelope tyd is daar nogal baie kommentaar oor die “toestand” van die jeug. As die een nie Samorai speel nie, dan maak hulle ‘n sogenaamde sletlys bekend. Die televisie het die afgelope tyd darem baie tyd en energie aan die bekendmaking van hierdie “fenomeen” spandeer. Is dit regtig so uniek en is dit regtig so nuut? Ek glo nie…
Destyds in die laerskool is ons behoorlik bang gemaak vir swart motors met getinte vensterruite en vreemde mense wat op die buitewyke mag rondstaan. Jy’t gestap laat dit bars om by die volgende plek te kom, “want as jy stadig genoeg stap kan ‘n kar stadig verby ry en jou inboender”?!!! Dit was veral erger in die tyd van Gert van Rooyen en sy trawante, want ‘n familielid van hulle (in ons dorp) se dogter was byna die volgende target. Daar was natuurlik ook die boekie “Hou kop en sê nee” en al die bangmaakstories van vreemde oproepe, diep asemhaling aan die anderkant van die lyn ensovoort, ensovoorts, ensovoorts. Ek het nietemin die huis soos ‘n fort gesluit en gepoep vir vars lug.
So met al die dinge in gedagte sien ek toe op die televisiestukke dat ‘n bekende kletsnetwerk (die einste selfoon ene) geblameer word vir die verspreiding en bevordering van pedofilie en kinderpornografie. Is dit net hierdie tipe netwerke se skuld? Ghmmm ek twyfel weer. Is dit nie ook maar die toeganklikheid van alles deesdae nie? Selfone is vrylik beskikbaar en word vinnig uitgepluk om ‘n foto of video te neem. Die spoed waarteen kinders daar sleuteltjies slaan is reeds verstommend – wat nog te sê van al die funksies wat hulle so maklik kan gebruik! Daar is tog sekerlik nie ‘n Nanny program op selfone se internetdele nie? Daar is tog sekerlik nie ‘n manier hoe ouers kan keer dat kinders aan geweld, pedofiele, pornografie etc blootgestel kan word nie…selfs al word die selfone afgevat is ‘n pal s’n mos altyd naby…en ek is seker sussie sal ‘n kabaal opskop as sy ‘n stokou pre-internet foontjie moet gebruik.
Ek kry hedendaagse ouers bitter jammer. Daar is net geen manier hoe hulle teen die invloede en beskikbaarheid van tegnologie kan skop nie. Die goed wat gister-aand op Special Assignment gewys is, is niks minder as skokkend nie…en ek was al naby al daai plekke in my lewe! Goeie genade…
Lees ook elders van ander se menings hieroor
(..en iets oor kinderveiligheid…http://www.kindersafe.co.za/aboutus.htm)
Waar was jy op 9/11?
‘n Tydjie gelede het ek ‘n lelike rellie met ‘n groentjie-verkeersman afgetrap toe hy die oorsaak van my ongeluk was. Dis natuurlik afgemaak as “jong vrou – wat weet sy”, ensovoorts, ensovoorts. Gelukkig kon ek my onskuld bewys het.
Hier in ons dorp is daar soggens verskeie dienspunte, maar die manne in blou is in hiberneer “mode”. Die een staan en sms, een sit in sy privaat motor, een staan met sy hande in sy sakke en ‘n ander se reënjaskappie hang oor die oë. Vanoggend ry ek agter een van die nuutste toevoegings tot die verkeersdepartement se vloot – gevul met drie lede. Nou ja…as jy die dorp se verkeersligte ken, weet jy dat die lig rooi slaan en onmiddelik ‘n pyltjie na links gooi…en daar staan ons spietkopkar toe doodstil. Met my vooroordeel en geskiedenis in-ag-genome gee ek toe ‘n ligte “kry jou ry”-toet. Drie paar oë het my doodluiters aangegluur en toe eers trek DIE KAR weg. Party mense het ook baie tyd vir bolletjie rol…
Daar is natuurlik ook die storie dat hulle jou kan toesluit vir uitstaande boetes…lees meer daaroor
Vanaand lui magoed en vertel van ‘n ding wat nou in die Paarl gebeur. Gisteraand na 12 het ‘n kennis se man huis toe gery en in ‘n padblokkade in die Hoofstraat beland. Spietkop se kind vertel toe dat hy moet blaas en dat die nuwe tegnologie ‘n uitslag binne ‘n uur en ‘n half kan uitskop. Ek glo nie altyd alles nie en is nie so seker van die “net enetjie” nie, maar nou ja…die man moes sy kar afskakel en vir ‘n halfuur lank sit en wag…dís darem nou magsmisbruik as ek al sulke nonsens gesien het! Wat maak ‘n mens as jy vrou-alleen in die middel van die donkernag daar moet sit? Bestaan daar nou regtig sulke kontrepsies?
Nou ja..Klong (pa se enigste seun) het die Groot Trek na ‘n ander dorp, my tienernukke, “futtup” boyfriends en my swottings meegemaak. Ek wou hom op my troue as “ringdraer” inspan, maar teen daardie tyd was hy al oud en kranklik en vol pyne. Dis erg as jou grootste aanhanger en vertroueling so agteruit begin gaan…dis naar om te aanskou…nou ja…as ek eendag groot is, wil ek weer een hê
‘n hele paar jaar gelede het ons ‘n show by die KKNK gaan kyk in een van die weermag se sale…in die voorportaal was ‘n anit-plaasmoorde uitstalling wat jou laat dink het aan een van daai politiek partye wat eintlik ‘n skandvlek op my bevolkingsgroep se naam is…wel volgens my en omdat ek die eerste keer van die party gehoor het toe hul leier in sy groen onnie parade het – soos die keiser van ouds…en dan was daar die perd insident ook…vandag was daar weer ‘n artikel in Die Burger se By oor die einste lot en hul volgelinge…as jy hulle website google, word jy gegroet deur die bekende wapen en dan skitter-knipoog ‘n arend vir jou…wat is dit met die arend?! Die VSA se kentekens en wapens is besaai met arende en dan het ou Hitler sy knape ook daarmee “gelei”.
Volgens die net is ‘n arend met ‘n dubbele kop die simbool van “secular and ecclesiastical authority”. Die arend word ook met die vryemesselaarsbeweging verbind. Selfs in ‘n Vermeer-werk word dié simbole bespeur “The light hanging above the artist is crowned by a double-headed eagle, symbol of the Habsburg dynasty which since the 16th century had governed the seventeen provinces of the Netherlands that appear in the map on the end wall (and which still governed the southern provinces).”…
Ek dink hierdie tipe simbole van skerp kloue, oë wat alles raaksien en skerp, moordende bekke kan enige mens die skrik op die lyf jaag…maar nou ja…I don’t get it…nie die simbool nie en ook nie die rede waarom sulke organisasies bestaan nie…peace brother
Kleindag het my suster en haar maatjie die aanspreekvorm “my bra” iewers tydens ‘n shoppingspree op die Kaapse stasie raak “gehoor”…en dit het natuurlik vasgesteek. Ons is vir etlike jare daarna geïrriteer met hul groet – “Hoesit my bra…lekker my panty”…aaklig en frustrerend
Dis eers jare later wat ek die opregte, eerlike vriendskaps-betekenis agter hierdie term leer ken en ervaar het. Ons is mos maar deur die Calvyne geleer om ordentlik te wees en reg te praat en terme soos “my bra” was uiters ongehoord…Ek het nogal etlike kere gegiggel as ek volwasse mans (dis nou bo 50) dit hoor sê het…dis so half kinderlik…onskuldig…maar tog die mees opregte vorm van waardering vir ‘n vriend.
Hier is ‘n tune vir al my bra’s…
Goed…ek het vroeër genoem dat ek van Clive Cussler se boeke hou. Dis seker maar oor die see-tema…
Ek het vandag weer so na my boekrak gekyk en Nathaniel Philbrick se boek “In the Heart of the Sea” raak gesien. Dit handel oor die gebeure agter die hele MOBY DiCK storie en vertel die hartseer verhaal van die ESSEX. As jy ooit ‘n boek gesoek het wat ‘n rondom historiese feite gebou is, skaf gerus dié outjie aan.
…en as jy daarvan gehou het, lees ook die verhaal van een van die bemanningslede van die einste ESSEX: Owen Chase en hier is ‘n voorsmakie .
Om die een of ander rede het ek ‘n liefde vir ou motors – regte antieke motors. As ek hulle op die pad “raak ry”, kan ek nie help om te staar nie. Ek weet natuurlik niks van ou motors (of enige motor “for that matter”) se binnegoed, perdekrag en petrolverbruik nie…mooi bly egter mooi. Ek twyfel egter of ek met so ‘n ou kar oor die weg sal kan kom. ‘n Vriendin stel dit so mooi…jy sal die kar moet dryf…soos ‘n lorrie. Ek het darem te gewoond geraak aan my motor se kragstuur…en dít na jare se bokwa-ry!
Johan Rupert se versameling word in Franschhoek gestoor en ook uitgestal. Die motors (oud én nuut) is op die Franschhoek Motor Museum se webwerf beskikbaar – om na te kyk en om na te luister! Jy kan die “engine” so ‘n bietjie “rev”…probeer gerus ‘n Ferrari of twee
Ek het gou kom loer wat op die blogs aangaan en hoor die heeltyd die gegil en skree van ‘n over acting tante op die agtergrond (iets op M-Net)…gedog ek soek ‘n gilwekkende ietsie, maar kry toe eerder dié nommertjie
en …sê net iets negatiefs!
Ek het vanoggend ‘n fliek genaamd DEAD SILENCE gelê en kyk. Dis nogal grillerig. Vir mense wat in spookstories belangstel, loer gerus hier… Dit val so in die lyn met movies soos IT.
Nog paranormal dinge…Wie kan nou van die Lochness monster, die Bermuda Driehoek en Bigfoot vergeet? Wel, nou het jy darem seker ‘n oordosis nuttelose inligting bekom…
Die USS Cyclops het in 1918 in die omgewing van die Bermuda Driehoek verdwyn. Sy was 542 voet lank en het steenkool verskeep gedurende die Eerste Wêreldoorlog. Op een van haar vaarte het sy ‘n pitstop in Barbados gemaak en weer vertrek…maar sy’t nooit haar bestemming bereik nie. Die skip het met 306 mense soos mis voor die son verdwyn. Geen teken van haar of haar passasiers is ooit gevind nie…en natuurlik het Clive Cussler ‘n boek oor die Cyclops geskryf…en dis wat ek tans lees!
Twee niggies, Elsie Wright en Frances Griffiths, van Cottingley (Engeland) het in 1917 foto’s van feetjies geneem. Elsie was 16 en Frances was 10 jaar oud. Hulle wou dit eintlik net doen om vir hul ouers ‘n streep te trek. Toe sien ‘n fotograaf dit en die skrywer van Sherlock Holmes hoor daarvan en die storie ruk toe heeltemal hand uit.
Klaarblyklik het ‘n navorser in 1978 op ‘n boek genaamd Princess Mary’s Gift Book afgekom met die einste feetjie-prentjies daarin. Die boek het in 1915 verskyn – net voor die groot fotonemery.
In 1981 het die niggies met die sak patats vorendag gekom en gesê dat die foto’s nie ware feetjies in het nie, MAAR dat hulle wel feetjies gesien het.
Maak ook seker nie saak…na die onsmaaklikheid van die oorlog sou ek ook in feetjies kon glo.
Nou ja…dit smaak my dat feetjies oulik en vriendelike vlieënde wesentjies is, terwyl pixies stoute “kabouters” is. Hulle is soortvan die stoutgatte, slette en willewragtags van die lot. Volgens legende is pixies Iers of Celtic van oorsprong en is dit die maer kreatuurtjies met die spits ore. Dis hulle wat vermoedelik die skoenmaker se skoene kom klaar maak het. Ek vermoed ‘n elf en ‘n pixie is dieselfde ding…dalk dra ‘n elfie net meer klere. Wel, al glo jy nie in pixies of feetjies nie, kan jy steeds uitvind wat jou naam sou wees…kyk net…myne is Princess Twinkle Toes Queen of All Fairies
My nefie het een dag ‘n Garbage CD by my suster gelos. Sy’t nie daarvan gehou nie en ek het dit later geleen en ek moet sê dat dit nie te bad is nie. Dis soms donker…soms net ‘n sommer-song. Ek het later agter gekom dat daar laatnag goeie musiek op Barney Simon se show gespeel word. Kan jy dit dalk onthou? Een aand speel daar toe ‘n tune genaamd Pepper - glad nie sleg nie. Dis een van daai “ketchy” (catchy) liedjies wat oor en oor in jou kop speel. Een van die ander ketchy tunes, was Mr Big se “to be with you”…’n regte HAIR band! Soos Guns ‘n’ Roses en die ander “heavy metal” aka “rock” bands uit die 90’s…blykbaar was “HAIR bands” ‘n 80’s ding…Jare later het ek Radio 2000 se Rock of Ages Show op Donderdag-aande raak geloop. Dit was ‘n hoogtepunt van die week. Ongelukkig het die politieke inmenging
Wel, hier’s ‘n tune vir die sommer, vir ‘n “trip down memory lane”, vir bad hair en stywe broekies…
So ‘n maand of twee gelede het ek ‘n grys haar tussen die hare op my linker “slaap” gesien…gedog dis net ‘n floppie of iets, maar vandag het ek nog drie gesien! Wat maak ‘n mens as daar nog baie aanteel? Kleur jy dit of laat jy die grysheid toe om oor te vat?
Ek het ‘n bietjie loop rondgrawe na ander se opinies. Dié wat glo dat jy met “grace” moet oud word – is almal modelle! Ek sal seker maar laat groei totdat ek gaivol is en dan weer kleur…
Dié van julle wat die musiekgroep dDisselblom ken, sal weet wie Oupa Tromp is. Dis Jaco Spies se oupa aan sy ma se kant – ‘n oud-boer en digter van formaat. Op Goud en Marog is daar ‘n stukkie waar ‘n telefoongesprek met hom opgeneem is…hoendervleisgoed…Oupa Tromp is gister-aand oorlede…
HERINNERING
Woorde: Tromp J. Nel
‘n Nimfie uit die see
Kleine wese, so fyn en rein
Skuifel sy al nader
Sit op die stoel langs my
En vra ‘Oom! Hoe skakel jy aan my?’
Teruggeruk ‘n halwe eeu en meer
Sien ek weer haar oë
Teelepels vol diep blou see
En sy vra ‘Oom! Hoe skakel jy aan my?’
Goue hare oor haar skouers hang
HANTAMBERG
Dolorietspatsels van die outyd
Hier opgestappel krans op krans
Yl blou berge van die Hantamwyk
Waar klipmuur die berg omsoom
En natuurkinders aan jou hange wei
Kan ek die dag omdroom
As soggens vroeg jou wange bloos
En skadus uit jou klowe kruip
Ontwaak jou prag van bos en struik
Die sterboom skiet die hoogte in
Terwyl jakkalsjong en roosmaryn
in my neusgate sluip
Hantamwyk
Hantamberg
Tuiste van mens en dier
Hier wil ek altyd werk
My siel en liggaam se rusplek
Die rykdom van jou rooiklei
Sal welddadig deur my vingers gly
Bron van broepie en kambro
Jou somerson kan skreiend skroei
Sodat goudgeel graan weelderig groei
Die groot Meester argitek
Het jou kleureprag geskep
Met oordadige weelde, sodat ek
My gees kan voed en verryk
Deur te leef in die Hantamwyk
In die winter sal die sneeubedekte kruine
Lewende water voed aan die fonteine
As jy wegkruip agter misgordyne
Terwyl lang slierte winterweer
Aan die hange van Hantami sypel neer.
Yl blou berge van die Hantamwyk
Wat klipmuur die berg omsoen
Natuur kinders aan jou hange wy
Kan ek die dag om droom
Nou ja…nóg ‘n skandaal! R3,7 biljoen?! Liewe genade…wat nog? Weens Sasol se geknoeiery is daar nou ook ‘n probleem met die “was” voorrade. Geen meer wax jobs nie girls
Ek glo dat daar min dinge so verkwikkend is soos ‘n goeie stapsessie deur die winkels en harde kitaar riffs in die kar nie!
Ek was vanoggend sommer net moeilik…gatvol en moeilik. Toe sit ek maar die stuk in na die Mall toe en stap al die frustrasies uit…en wonder bo wonder het die winkels nogal goeie specials. Of dalk weet ek net nie meer wat goed kos en wanneer dit wel goedkoper is nie.
…was veronderstel om klere vir die nuwe seisoen te kry, maar koop toe allerhande ander nonsens…servette, kussingslope, kussings, houtlepels, plakkies vir manlief, ‘n bloes, ‘n bra, handeroom vir ‘n verjaarsdaggeskenk en die kersie op die koek: ‘n Clive Cussler boek!
Nou ja…die gatvolgeite is uitgewoed en dis tyd vir skoene uitskop en rus…lekker naweek!
‘n Unicorn / eenhoring is ‘n mitologiese gedierte. Tradisioneel is dié gedierte ‘n perd met ‘n gesplete hoef, ‘n bokbaardjie en het dit ‘n leeu se stert. Daar is ‘n gewone een en ‘n pienk een. Die pienk een is soms ook deursigtig…
Unicorns word nie net ‘n “kitch” kunswerke gevind nie, maar is al sedert (ongeveer) die 26ste eeu n.C. aan die mens bekend. Dis die eerste keer in China (made in China?) opgemerk. Die beskrywing is dat ‘n Unicorn se stem soos die geklingel van klokkies klink, dat sy liggaam reënboë verskillende kleure uitstraal en dat hulle vir duisende jare lank kan leef. Hierdie kreature bring geluk.
In die Middeleeue se stories is die Unicorn ‘n gesogte dier om te jag en kan dit slegs deur ‘n maagd gevang word (altyd ‘n maagd!). As vergiftigde kos naby die horing gebring word, begin dit bloei. As jy egter die horing bo-oor die kos waai – word dit weer eetbaar. Natuurlik sou nare besigheidsmanne hierdie horings wou hê…Hierdie “perdjie” is dus ‘n gelukbringer – met helende kragte…beslis iets om in die agterplaas aan te hou.
Gaan maak vir jou ‘n Unicorn inspirasieplaatjie, kry vir jou ‘n Unicorn-naam of kry vir jou ‘n ge”bling“de unicorn vir jou blog!
Ek lees gister in die koerant van die Wolfkind Sindroom en begin toe ‘n bietjie rond snuffel op die net. Dis ‘n sindroom wat toegeken word aan kinders wat saam met diere groot word en soos hulle optree en reageer. Buiten die menslike liggaam, is hulle feitlik nes die diere. Kinders wat deur wolwe groot gemaak is, sal byvoorbeeld tjank en jag soos wolwe. Daar is ‘n hele lys beskikbaar van kinders wat deur honde, wolwe, bokke, bere, leeus, volstruise, ape, skape en selfs koeie aangeneem is…
In Mei 1835 het Mollie en John Dent in die Devil’s River omgewing strikke gestel toe Mollie in kraam gegaan het. Daar was komplikasies en manlief het gaan hulp soek. Hy het by Indiane of Mexikane aangeklop om hulp. Net toe hulle wou terug ry na die Dent’e se huis toe, het ‘n weerligstraal hom dood geslaan. Die mense het na Mollie gaan soek, maar die kind was skoonveld en Mollie het klaarblyklik weens die komplikasies gesterf. Wolfspore was oral rondom die liggaam en daar is aangeneem dat die kind verslind is.
Tien jaar later het ‘n seun ‘n jong meisie gesien wat saam met wolwe jag. Dit was eintlik ‘n vreemde kreatuur met lang bosserige hare wat soos ‘n meisiekind gelyk het. Sy het eers hande-viervoet en toe regop begin weg hardloop. Die volgende jaar het ‘n vrou dieselfde gesien en die Indiane het begin vertel dat hulle voetspore en soms handafdrukke naby wolfspore opgemerk het. Daar is toe besluit om haar te jag.
‘n Klomp cowboys het die meisie gekry en afgesonder van die trop. Terwyl hulle haar vasgebind het, het sy baklei soos ‘n besetene en vreemde grom-tjank geluide gemaak. ‘n Wolf mannetjie het nader gestorm, maar is dood geskiet. Die cowboys het die wolfmeisie na ‘n ranch geneem en toe gesluit. Daar het sy getjank en ander wolwe gelok. Die wolwe het die vee begin aanval en in die harwar het die meisie deur die venster ontsnap en verdwyn…en sy is nie weer gesien nie.
Dis nogal grillerig…die gedagte dat ‘n mens kan verdwyn sonder dat daar vreeslik gesoek word…Dit gebeur blykbaar steeds dat kinders agterbly en dat familie hulle eenvoudig verwerp – om self te sien en kom klaar. Selfs al word hulle gevang en terug geplaas in normale gemeenskappe, is hierdie kinders nooit werklik normaal nie. Hulle bly wild.
…kry jou wolfnaam…
kliek op die prente om te vergroot
Ek glip gou vanmiddag Checkers toe vir die noodsaaklikste dinge – tjips. Daar gekom, loop ek gou na die afdeling waar hulle boeke, tydskrifte, cd’s, koerante en DVD’s aanhou…ek kan mos nie verby ‘n boekrak loop nie! Daar sit ‘n vreemde ou in sy laat 30’s of vroeë 40’s op ‘n bank en koerant lees – natuurlik for free…Uit die bloute hoor ek “daar is ‘n poephol by die werk…” WAT?? Ek kyk nie om nie…my neus is teen ‘n tydskryf se voorblad vas…ek weet nie of ek moet stik of lag of verdwyn nie…”daar is ‘n poephol by die werk…” Ekskuus? Dié keer loer ek half na die man se kant toe. Hy lees koerant…beentjies gekruis soos ‘n lord by die country club. “Daar is ‘n poephol by die werk…”…met die derde keer “Ekskuus?” ek hardop. “Ja. Daar is poephol by die werk. Hy was in ‘n Technikon. Hy het nie Universiteit toe gegaan nie. Ek weet nie hoekom mense Technikon toe gaan nie.” ….me thinks Jy was seker nie in een van die twee nie, Dude…Ek skuifel-skuifel maar toe weg van die funny man af weg en loop betaal vir my tjips. Dít is wat gebeur as jy veronderstel was om net tjips te koop
Dis een van die dae weer Halloween en alhoewel ons dit nie eintlik vier nie, is die winkels tog vol Halloween dinge. Volgens inligting, was die vroegste gebruik op 31 Oktober om die nuwe seisoen aan te dui. Die Kelte het die aanbreek van Herfs gevier voordat hulle met hul kudde na beter weivelde en beter weerstoestande sou soek. Daar was ook ‘n bygeloof dat die siele van mense wat in die voorafgaande jaar gesterf het, op die 31ste Oktober verrys en met die lewende mense sou meng. Hierdie siele het dan ook ‘n liggaam gesoek om in te neem vir die volgende jaar…dis seker waar die Zombie gedagte vandaan kom…as dit lyk asof jou liggaam “oorgeneem” is, is jy op ‘n brandstapel verbrand…of so gaan die legende. Die Keltiese gebruik van groot “bonfires” word natuurlik steeds gebruik. Die idee is dat dit die bose geeste afskrik…
Dit lyk ook asof die Halloweenfeestyd eintlik ‘n Ierse oorsprong het en dat dit later wêreldwyd versprei het. Die Iere vier die aand deur aartappels, kool en rou uie te eet (‘n gasvrye geleentheid). Skoon gewaste munte word toegedraai in bakpapier en in die aartappel versteek – vir die kinders se spaarvarkies.
Die Jack o’Lanterns is ook ‘n Ierse gebruik. As jy tyd en lus het om pampoene te kerf…gaan loer gerus hoe…as jy so lui is soos ek…gaan koop ‘n pak of twee of Halloween sweets, neem ‘n paar scary movies uit en kyk dit agter manlief se veilige rug
Word oud genoeg sodat jy ‘n probleem vir jou kinders word…
So gepraat van Oom Orbach…Dirty Dancing was ‘n epiese storie…wel vir ‘n klein dogtertjie was die gedans en funky musiek nogal great…en ons het al die moves geken! Liewe hemel!
Ek merk op dat Otis Redding se tunes redelik gewild was in Dirty Dancing…Jennifer Grey lyk ook nie meer dieselfde nie…die snymes het seker ‘n paar keer by haar gekuier. In elk geval…sy’s in 1960 gebore en was destyds aan Johnny Depp verloof. Patrick Swayze is ‘n 1952 baba. Ek dog sterre bly altyd jonk! Albei kon my ouers gewees het!
(hoogtepuntjies…)
en jy het gedink jou werk is gagga!
“Hitler’s resolve to castrate modern artists only strengthened Picasso’s obsession with the bullish minotaur, writes Robert Nelson.”
So Hitler het nie van Picasso se kuns gehou nie! Ai. As hy maar net geweet het hoe bekend die man se kunswerke sou word…Dit is juis vandag ‘n herdenking van Pablo se verjaarsdag (gebore 1881). Ek las ‘n videotjie van sy bekendste prente. Guernica was ‘n direkte kommentaar op Hitler se oorlog.
Die tromslaner van Red Hot Chilli Peppers verjaar vandag. Dis eintlik al ooreenkoms tussen die twee (but I still made you look). Dalk is die ander ooreenkoms dat ek van beide hou.
Nou ja…lekker dag uit ‘n winderige, stowwerige Kaap.
Marmite is laag in vet- en suikerinhoud, “vegatariër-vriendelik” en vol Vitamien B. Dit het eers teen 1902 in sy potjie verskyn en is steeds een van die gunstelingsmere. My eerste herinnering van Marmite is dat ek dit op warm toast geëet het. Dit was altyd lekker as die louwarm botter en Marmite op die vars toast smelt. Die geneuk is net dat die kans baie goed was dat die gesmelte storie op jou klere gedrup het óf dat die broodjie op die een of ander onverklaarbare rede uit jou hand, Marmitekant eerste, op die vloer beland het!
Watter Marmite memories het jy?
Dié foto laat my aan die intro van die volgende tune dink:
Dis is baie nat hier – skielik…en daar is ‘n parra op die trap. Dit laat my dink aan toe ek klein was. Ons het vir Ma in die tuin gehelp…ek was so 5 of 6 en my suster was ongeveer 3 of 4 jaar oud. So tussen deur die grawe en help deur spring daar toe skielik ‘n padda voor ons verby…seker maar ‘n kleintjie. Ma wys natuurlik die ou diertjie uit – waarop Sus opmerk: “Dis nie myne palla nie”! Nou ja…dié een is ook nie myne nie…hy’t net van nêrens af nader gehop en by die huis kom inloer
Vandag was weer een van DAAI dae by die werk. Die heel jaar se afsloof en rondhol kom nou tot ‘n punt en die wetters by die werk het wragtag tikkel tokkol gedoen van hul kant af , “want bobjaan Cebella het mos afskrifte”!!! Ek het gedog ek kan slange vang…totdat ek Die Werf beloer het en besef het waarom my dag so k@kkerig was – dis Wêreld Toiletdag! I kid you not! Wêreld K@khuisdag!
Diegene wat al by ‘n Gert Vlok Nel show was sal die absolute magic daarvan ken en besef. Ek dink sommer vanaand weer aan ‘n paar liedjies wat net eenvoudig droommooi is. Gert het ook gereeld ‘n Pussycat song ingesluit – genaamd “My Broken Souvenirs”… As jy nog nie by ‘n Gert show was nie, luister gerus na hierdie nommers in absolute stilte…maak jou oë toe en ontspan…dis genoeg om enige mens se nare dag weg te dryf…absoluut lieflik
Die oud-voorsanger van een van my gunstelingbands, Ozzy Osbourne, verjaar vandag. Soos goeie wyn het die omie beter geword…luister bietjie…
SA se eie Jack Sparrow…
Dis weer Krismistyd en alles is rooi, silwer, goud en groen versier. Die hele Krismisding maak my klaar, want die stresse is net eens te erg! Waar gaan ons eet? Eie ma of skoonma? Wat koop ons vir wie? Wat is die budget? Hoe draai ek die geskenke toe? In ‘n fênsie geskenksakkie en tissuepapier, gewone geskenkpapier of ‘n kunstige lapkontrepsie? Hoe maak ‘n mens met ‘n boom? Is dit ‘n regte een of ‘n plêstiek een? Die regte bome lyk soms so motgevreet en nie Woolies se versierings sal die gate optert nie…Ek het so ‘n paar jaar gelede ‘n Krismiswinkel binne-in ‘n groot winkelsentrum gesien! Kansvatters!
Ek sien die kleurskema’s vir Kersfees is ook besig om te verander…is dit dan nog Krismis?
Ag, dit maak seker nie saak hoe die tafel en dinge lyk nie – solank almal net vreed(t)saam kuier! Hoe lyk jou Krismis? Idees vir die tafel? Idees vir geskenke?
Vandag is dit reeds vreeslik hittig teen 07:00 en twee bekendes verjaar: Steve Buscemi en Amy Lee. Steve is ‘n gesoute en een van my gunsteling-akteurs, terwyl Amy die hoofsanger van Evanescence is. Hiermee dan ‘n tune van Evanescence…luister bietjie…Amy het ‘n merkwaardige sterk stem…
Ek het vroeër ‘n ding oor argeologie en genetika op Emil se blog gelees en toe weer gedink aan beeldjies van die antieke beskawings en beeldjies wat ons vandag kry…
In doerie tyd het die mense vas geglo in die kragte van sekere beelde en gode. Dink net aan die Venus van Willendorf – ‘n vrugbaarheidsgodin wat in Oostenryk gevind is – en die simboliek van katbeelde in antieke Egipte… Katte is destyds met die onderwêreld en die songod Ra verbind. Daar is geglo dat katte snags na die onderwêreld reis en voor sonsopkoms terug gekeer het. Daarom is daar ook vir jare lank messe met katgraverings saam met die dooies begrawe – om hulle te beskerm en te help op die pad na die hiernamaals.
Bestaan daar nog sulke gelowe in die simboliek van prente, sketse en beeldjies? Glo mense nog in gelukbringers? Watter volg jy na?
Geseënde Kersfees en ‘n Vreedsame 2009! Mag die famdamily jou nie te veel irriteer nie en mag jy iewers ‘n bietjie zen ervaar.
So loop ek toe gister gou by die naaste winkel in – net vir ‘n comfort tjippie – en stap reguit sigarettoonbank toe om te betaal. Voor my staan ‘n vrou – duidelik klaar gewerk in haar netjiese werkspakkie – besig om te neute display te beloer en te kies…so rustig soos koei wat staan en wei…en tussen dié vrou en my staan ‘n man. Woeps! Glip ‘n vrou hier voor my in, sit albei handpalms op die toonbank, glimlag soos ‘n kanibaal vir sy ete sal maak en sê ewe bedag “hello”?! “Bliksem!” weergalm dit in my kop en “Excuse me! Stand in line!” blaf dié biets. My wange gloei voelbaar tamatie rooi. ‘n Duidelike teken dat ek hoogs bedonnerd is (daar was vermoedelik ‘n wit ring om my mond – volgens manlief)…en toe ek opkyk kyk ek in die man se gesig vas…Eish…dan lag mens maar skaam-skaam vir jou ontploffinkie…Dank die hemele dis naweek…
“I refuse to accept the view that mankind is so tragically bound to the starless midnight of racism and war that the bright daybreak of peace and brotherhood can never become a reality.”
Rev. Dr. Martin Luther King, Jr.,
December 10, 1964.
Naaldekokers is nie net ‘n modegier op beddegoed en in tattoo’s nie. Dis blykbaar vol simboliek. Ek het vandag op ‘n stadium verby die tuin geloop en so ‘n blouerige een op die uitloopsel van ‘n afgesaagde vyeboomstomp sien sit. Baie cute…en toe loop loer ek op die net…
Naaldekokers steek blykbaar nie en vreet veral muskiete. In Burma het die mense eens die Geel Koors (wat deur muskiete versprei word) beheer deur met naaldekokers te teel en met tussenposes los te laat.
In China is die naaldekoker net ‘n simbool vir somer en feeblegeit. In Japan gaan dit eerder oor geluk, sukses en dapperheid. Dis tydens die 11de eeu as deel van die koninklike embleem ingespan en is op borde, meubels en eetgerei aangebring.
Die Samurai familie het die naaldekoker weer in hul amptelike familiewapen gebruik. Japan het selfs eens bekend gestaan as Akitsushima (Eiland van die Naaldekokers).
Dekades gelede het die Europiërs en Amerikaners hul kinders tot slaap gedreig deur te sê dat ‘n naaldekoker hul lippe, oë en ore sou kom toe werk. Die Swede het weer geglo dat naaldekokers spesifiek op oë in zoom en graag mense se oë steek (Blind Stingers).
Vandag is dit hoofsaaklik ‘n simbool vir vernuwing en positiewe dinge…
“What we do for ourselves dies with us. What we do for others and the world remains and is immortal.” 
Albert Pine
Ek is mos ‘n Clive Cussler fan en het onlangs Lost City klaar gelees – ‘n bietjie vergesog, maar steeds boeiend.
Die boek begin waar ‘n liggaam met ‘n geheim in ‘n gletser gevind word waar hy reeds dekades lank gevries is. Dié man was deel van ‘n familie wat geslagte lank betrokke was by wapens – die vervaardiging en verskaffing daarvan. Dan is daar ‘n fassinasie met ‘n helmet vol graveerwerk en ‘n geheimsinnige plaas in die heuwels van Frankryk. ‘n Paar geheimsinnige sterftes onder raaiselagtige omstandighede lei tot die ontdekking van ‘n eiland waarop eksperimente op mense gedoen word en ‘n navorsingsprojek om die “Elixir of Life” te kry. Dis ‘n middel wat ensieme gebruik wat in die Lost City torings in die middel van die Atlantiese Oseaan voorkom en wat ‘n ewige jeug verseker (Fountain of youth-effek).
Dit het my weer laat dink aan die meer mitologiese en fabelagtige verhale van verlore dorpe, stede en selfs kontinente. In ongeveer 355 VC het Plato reeds vertel van Atlantis en die mensdom is steeds opsoek na dié plek se oorblyfsels. Dit was ‘n stad op die voorgrond van die ontwikkeling van Argitektuur en het uit konsentriese mure (kringe wat wyer en wyer loop) en kanale bestaan. In die middel van die kringe was ‘n heuwel met ‘n standbeeld van Poseidon op. Na die een of ander ongelukkigheid het die gode reuse branders gestuur om die kontinent of eiland te verswelg. Bespiegelinge het Atlantis in die middel van die Atlantiese Oseaan, naby die Griekse Eilande en selfs naby Brasilië geplaas. Wonder waar Atlantis sou wees?
Maar terug by die Elixer…Highlander was nogal ‘n gunstelingprogram. Dit was eenvoudig net fascinating… Ook maar ‘n sucker vir ‘n strontstorie…
Ek woon oorkant ‘n lykshuis – een van daai waar die lyksbesorger se gesin ook in dieselfde gebou woon. Die kinders dra konstant swart en hulle velle is bleek. Die een lyk soos ‘n karakter uit ‘n gewilde cartoon vir volwassenes en die ander een begin darem nou ander kleure by die swart inwerk…soos kaki en charcoal
Ek het vroeër ‘n insetsel op die nuus gesien waar daar met ‘n Australiese brandweerman gesels is. Hulle is besig om die dorpe wat deur die brande verkool is te fynkam vir lyke. Dis om te keer dat mense op ontbindende lyke sal afkom as hul na hul tuisdorpe sou terugkeer. Aaklig! Dis soos ‘n tipe Pompeii…
‘n Mens wonder altyd oor die psige van ouens wat met lyke werk. Eet hulle vleis of is hulle vegetaries? Eet hulle tamatiesous en goeters soos niertjies en lewer of gril hulle daarvoor? Watter tipe drome droom hulle? Nagmerries of drome van die een of ander Happy Valley? Wat gaan in hul koppe aan? Hoe kry ‘n mens die “stomach” vir so ‘n tipe werk? Moenie my verkeerd verstaan nie…ek het baie respekte vir iemand wat so iets kan doen.
Wonder hoe kom ek toe op Vrydag die 13de by dié onderwerp uit?
Vanaand se Carte Blanche het ‘n insetsels genaamd Hell’s Kennels II gehad. Die tweede program oor dieselfde man se slegte behandeling van honde sedert 2001.
Die man se plotte (hulle het van twee geweet) was besaai van hoenderkarkasse wat sommer so vere en al tussen die klosse lang grasse neer geboender is, sodat die honde self moet sien en kom klaar. Ene Gawie (wat blykbaar R9 500 per maand verdien!?) slaap op ‘n bruin (bekakte) matras tussen vullis en vuil van 200 honde wat deur die werf krioel. Ag nee magtag man! …en dan loop hy met sy vuil, punterige klere en vertel dat hy ‘n dag-oue werpsel mooi oppas en self ontwurm…? Hy kort self ‘n dosis iets
Wetnose was die organisasie wat die honde van die perseel verwyder het en help versorg het…Hulle het ‘n redelike lywige lêer met advertensies vir dié plek se honde – ‘n paar honderd rand per hondjie – en dan vertel die man hy’t nie geld om die plek skoon te maak of om bakke aan te skaf nie. Hy’s ‘n afgetrede wiskundige en hy kan nie ‘n begroting opstel nie? Stront man!
Wat word van die mensdom as hulle sulke dinge toelaat ?
en dan beter nuus
Lees die Carte Blanche transkript…
Ek lees vandag in die BY van die knaap wat nou weer ‘n duiwel in elke huis loop uitkrap het! Die priester vertel ewe dat stories soos Teletubbies (?!) die een of ander euwel verteenwoordig en dat jy basies hel toe sal gaan as jy kitch beeldjies van engeltjies, mimes en dolfyntjies aanhou. My eerste reaksie was ‘n lekker giggel en die eerste gedagte was LIEWE BLIKSEM!
Nou ja…dan is ek ‘n evil bliksem. Ek het die Forest Family, nar borsspeldjies, ‘n My Little Pony unicorn en wie weet wat nog in my tas vol kindertyddinge. Ek het groot geword op Liewe Heksie, Sneeuwitjie en Aspoestertjie (goed daar is dalk fout met háár naam) se plate en stories. Siembamba was ‘n groot hit en my familie speel graag Solitaire (of soos ons dit noem – Patience) – my 81-jarige ouma inkluis.
Ek is erg oor my genealogie en het my oupa se oorlogrekords loop opsoek. My neef het die medaljes en dinge geërf, ek brand wierook, hou van Disney-flieks oor dolfyne en is mal oor Timone en Pumba. Ek is te dom om die Griekse Mitologie te verstaan, maar vind dit uiters fassinerend. Daar hang ‘n wind chime in die tuin en ek respekteer mense wat in touch is met die dieper dinge in die lewe. Volgens my is dit fantasties om liggaam én siel te versorg en te verstaan. Wat sal die man van spirituele dinge en programme soos Free Spirit sê?
Nee, oom. Jou ma het jou seker met ‘n stokie oor die kop geneuk as kind…wtf? Party mense sal ook seker enige iets glo…
PS: As jy ‘n lekker giggel nodig het, soek gerus die Rodney Seale groep op Facebook op.
Die hondeteler / mishandelaar is toe gemaak en word vanaand op Carte Blanche bespreek. Interessant genoeg kan jy die teler se telefoonnommer sommer vrylik op die net kry as jy sy hokke se naam google.
Gaan hy vervolg word?
Mededeelsaamheid is een van daai dinge waaroor jou ma jou altyd geneuk het…en toe besluit MNet dat hulle die land ‘n verdere lessie moet leer oor hoe dit werk…nou ja, toe wen Jason én Sasha. Nou wonder ek of die pryse sal verdubbel sodat elkeen sy eie goodies gaan hê of gaan hulle beurte maak? Een week ry Sasha met die C1 Citroën in Atlantis rond en die volgende week skuif die karretjie weer noord na Jason toe?! Die een week sing Jason met die mike en die volgende week is dit weer Sasha se beurt vir custody… ‘n Wen is ook darem nie ‘n wen as dit nie ordentlik gedoen word nie.
Wyl ek en manlief vanmiddag sit en rugby kyk, wonder ek so half gewyn waarom die Britse span die Britse Leeus heet. Daar is mos nie leeus buite Afrika nie?!…en dan dink jy sommer aan dinge oor leeus en so aan…
In my soektog na die oorsprong van die Britse Leeu embleem, kom ek op Koning Richard I af. Hy het van 1189 tot 1899 regeer en het as Lionheart of Leeuhart bekend gestaan. Hy’t op 32 begin met sy joppie as koning en geëindig op 42. Blykbaar was hy ‘n goeie krygsman – vandaar die naam. Sy pa was Koning Henry II en eintlik was Richard die tweede seun van ou Henry. Sy broer is vroeg oorlede en daarom het Richard sy pa se heerskappy oorgeneem. Volgens inligting was sy Ingels maar swak, want hy het die grootste gedeelte van sy lewe in Paddaland gewoon.
‘n Ander webwerf verduidelik dat die leeu op die Britse embleem na die Huis van Judah verwys en koppel aanhalings uit die Bybel daaraan. Dit het eintlik meer ‘n verbintenis met Judaïsme…en ook later met die Christendom…
Indien jy ‘n leeu op jou familiewapen het, beteken dit dat die eerste een aan wie die wapen toevertrou is heldhaftig, sterk en braaf was. Dis ‘n teken van waagmoed en ‘n bereidheid (gereedheid) om te veg en te verdedig. My nooiensvan het hasies en hondjies op die familiewapen. Wat maak dít my? Lojaal soos ou Wagter?!
Terug by Koning Leeu…As Leo jou sterreteken is, word jy beskryf as lojaal (alweer!), territoriaal, passievol, vurig en trots. G’n wonder dat die leeu orals voorkom nie!
Nou ja…genoeg gewonder…
Nesquik het dit goed gedink om my gunstelingmelkdrankie – Cream Soda Nesquik – terug te sit op die rak! Jippie!!
Ek het lanklaas iets oor datums en dinge gepost. Gister het DIE BURGER genoem dat Elias Howe “verjaar” het. Hy was die ou wat die naaimasjien gepatenteer het. Elias is in 1819 in Amerika gebore en het die meganiese naaimasjien in 1846 gepatenteer. Natuurlik het hy die idee eintlik by iemand anders gekry – soos mos maar meestal die geval is…
Ek dink ons het seker almal ‘n ma of ‘n tannie of ‘n ouma met ‘n ou naaimasjien wat iewers uitgestal word. Ek sit self met ‘n ou, grys-geverfde elektriese naaimasjien – vir as ek dit eendag wil gebruik of regmaak of iets. Nie juis my cup of tea nie, maar ‘n mens weet tog nooit…
terloops…wie onthou die naaimasjiene?
Ek is nie iemand wat werklik in poltergeist-goed of spoke glo nie, maar tog raak ek vrek bang vir die gedagte daaraan. Die term “poltergeist” is blykbaar afgelei van die Duitse term wat “klop” en “geeste” vervat. Deur die eeue heen het menige mens al spoke “gesien” of iets in die kamer “gevoel”. Ek verkies om te glo dat dit maar net ‘n manier was om kinders uit die kwaad te hou of om mense te verhoed om in jou huis rond te krap. 7de Laan het mos nou juis weer hierdie gedagte aan spoke opgehaal…en so het ons plekkie se buiteligte gister-aand getrip – sommer so ‘n slag en toe niks. As jy die switchy wil bykom, moet jy onder ‘n trap in klim en tussen die spinnerakke deur beur tot by die kas – genoeg grillerigheid om jou te laat sidder sonder die wete van ‘n gees in die hoek…So het bure almal in die donker gestaan en wonder oor wie nou die switchy sal probeer bykom – met net selfoonskerms as beligting…hoendervleisgrillerig…Gelukkig kon die manne ons toe uit die verknorsing van donker red. Nuwe buurvrou kon egter nie tot ruste kom nie en het teen donkernag die opsigter met ‘n benoude oproep wakker gemaak oor geluide in die dak…hmmm Ek glo 7de Laan se strooi het seker hier ‘n rol gespeel…
Onse munisipaliteit is vreeslik in die nuus oor eiendomsbelasting wat met vreeslike persentasies gestyg het. In teenstelling met die “nood vir verhogings” ry die burgemeester met ‘n slap, swart Merc – op die agterseat soos ‘n wafferse TV ster!
Ek weet steeds nie waarom nie, maar die einste munisipaliteit het onlangs besluit om ‘n stukkie middelman te versier met Petunias. Lieflike bosse roosmaryn is uitgeruk en vervang met reghoekige gate, toe geharkte reghoeke, gevulde reghoeke, reghoeke met stene om en ten laaste rye en rye petunias – perses en geles. Dit lyk sommer koekerig – soos iets uit ‘n 1980’s tydskrif op my tannie se koffietafel.
In ieder geval het ons toe vanaand ‘n lekker impromptu kuiertjie gehad. Dit gesels land en sand – van hoek tot kant en voor ons ons oë kon uitvee was dit reeds 01:50! Tyd vir kuiergas se huis toe neem en so ‘n vinnige draaitjie deur die dorp. Met die terugkom gewaar ons ‘n swart kat op die stoep en ry sommer ter stonds verby…verby die kuierplekke met die flitsende ligte en metalic groen Yaris (registrasienommer lui LETHAL-WP), verby bekende swerwers op ‘n keffie se stoep en verby die kroeë waar die locals uithang…en toe kom ‘n brandweerlorrie van voor af aangery…Natuurlik moet ‘n mens mos ondersoek instel en ons draai af in Petunialaan, waar ‘n kleiner noodvoertuigie staan en ligte flits so op sy eie…by nadere ondersoek het ‘n motor deur die middelman geploeg…lekker gekletter, maar hy’s okay…was Ma se kar…oooo…om gegooi van jaag…deur die een bedding, ander kant uit en verder tot in die volgende bedding in…Mamma was blykbaar baie ontsteld
Hippietyd was lank voor my tyd gewees. Ek dink dat hierdie mense ‘n lieflike stresvrye bestaan moes gehad het. Hierdie naweek was ‘n hippie herdenkingsnaweek in die kleine. Dit is 40 jaar sedert Woodstock …’n musiekfees met ‘n klomp great musikante…Richie Havens, Joe Cocker, Jimi Hendrix, Janis Joplin, The Who…noem maar op
Klankbord